araxyo Ismiidaamin ah oo ka dhacay caasimada Somaliland ee Hargeysa

(Jam)- Qaraxyo waaweyn ayaa saaka abaaro 10:00 aroornimo ayaa gilgilay magaalada Hargeysa, kuwaasi oo dad isa soo miidaamiyay isku qarxiyeen saddex goobood oo kale ah Madaxtooyada Somaliland, xafiiska dawlada Itoobiya u qaabilsan arrimaha ganacsiga iyo xafiiska UNDP ee Hargeysa.

Qaraxyadan waxa ku naf waayay 20 ruux, halka 28 qof ku dhaawacmeen. Allah ha u naxariistee dadka ku geeriyooday waxa ka mid ah xoghayihii gaarka ahaa ee madaxweynaha Somaliland marxuun Daahir Cali Iid, la taliyihii arrimaha hay’addaha marxuun Xuseen Muxumed Afgaab, Xubin guurtida ka tirsan Maxamed Cismaan Libaax, askar ka tirsan ciidanka Qaranka, shaqaale ka tirsan UNDP iyo dad shicib.

Weeradani argagixisada ahi waxay ku soo beegmeen xilli dalka Somaliland looga diyaargaroobayo doorashooyinka madaxtooyada oo lagu gudo jiro diiwaangalinta codbixiyayaasha.

Bishii September sannadkii 2005-tii ayay ahayd markii ciidanka amaanku gacanta ku dhigeen kooxo argagixiso ah oo xag jira, kuwaasi oo isku dayay in ay carqaladeeyaan doorashooyinkii baarlamaanka Somaliland.

Haddaba weeraradan lala beegsaday caasimada Somaliland ee Hargeysi waxay fajiciso ku noqdeen dadka reer Somaliland meel kasta oo ay joogaan, maadaama ay dhawr iyo tobankii sanno ee ugu danbaysay dalkoodu ku soo caano maaslay nabadgalyo iyo xasilooni dheeraada oo aan inta badan ka jirin waddamada deriska la ah.

Dhanka kalena magaalada Boosaaso ee maamul goboleedka Puntland ayaa laga soo sheegay in weeraro kuwan la mid ahi ka dhaceen saldhigyo ay lahaayeen ciidamada la dagaalka argagixisada, halkaasi oo hal ruux ku dhintay , toddoba kalena ku dhaawacmeen.